CEBU, Philippines - Gilakip sa kasong murder ug rape ang lima ka mga menor de edad nga mga sakop sa Crips ug Bloods nga mipatay sa kauban nila ug milugos sa uyab niini didto sa Barangay Buaya, dakbayan sa Lapulapu sa milabay'ng semana.
Matud ni SPO3 Editha Patalinghug sa Womens and Childrens Protection desk sa Lapulapu City Police Station nga ang maong mga batan-on pulos nagpangidaron og 15, 16, ug tulo niini tag 17-anyos.
Ang pagkalakip sa maong mga bayongbayong nahimo human mosugyot ang mga kadagkuan sa Department of Social Welfare and Development (DSWD) nga kinahanglang pasakaan sila og susamang kaso sa 19 anyos nilang kauban sa krimen.
Si Leticia Patalinghug sa DSWD kinsa maoy miimbistigar sa lima ka mga batan-on , miluwat na sa resulta sa iyang imbistigasyon nga nagsuta nga ang mga suspetsado diha sa hustong panghunahuna ug kabuot sa dihang ilang gilugos ang16 anyos nga babaye ug gipatay ang uyab niini.
Girekomendar ni Patalinghug ngadto sa kapolisan nga ipadayon ang pagdetiner sa lima ka batan-on kay lakip silang pasakaan og kasong murder ug rape .
Gipasabot ni SPO3 Patalinghug nga base sa balaod sa RA 9344, kini nagbuot nga ang 15 anyos pataas nga malambigit sa usa ka “heinous crime” kinahanglang susihon una kung sa pagbuhat niya sa krimen diha ba siya sa hustong panghunahuna.
Kung kini mapamatud-an mahimong kapasakaan og kaso ngadto sa korte, apan ang 15 anyos paubos ibalik sa kustodiya sa mga ginikanan base sa maong balaod sa RA 9344.
Kahinumdoman nga ang lima ka suspetsado gitumbok nga kauban sa grupong mipatay ni Russel Booc, 16, ug milugos sa uyab niining 16 anyos usab didto sa Barangay Buaya, dakbayan sa Lapulapu sa miaging semana. – BANAT NEWS