Sky diver namumo pagtugpa

CEBU, Philippines - Nasamad ubos sa iyang suwang ang usa ka sky diver atol sa gihimong bansay-bansay kagahapon sa buntag alang sa ika-65th nga kasaulogan sa Takas sa dakbayan sa Talisay (Talisay Landing) karong Marso 26, 2010.

Si Technical Sergeant Ashley Lee namumo sa suwang sa posteng puthaw sa net sa volleyball nga giugsok sa baybayon sa nahisgutang lugar sa iyang pagtugpa nga nag-parachute.

Gawas kang Lee, laing sky diver wala katugpa sa hustong lugar tungod kay napadpad sa hangin apan wala ibutyag ni ENS Joseph Ison, Public Affairs Officer sa Naval Forces Central (NAVFORCEN) ang ngalan sa maong sky diver.

Si Ison mibutyag sa mga tigbalita nga ang mga mibansay-bansay nga mga sky diver mao sila si Lee, Technical Sergeant Ferdinand Julius Gutang, Technical Sergeant Rizalio Ponay ug Technical Sergeant Dumagsa Benito Sotto III ug laing duha nga wala niya makuha ang mga pangalan tungod kay ang nahisgutang upat lang ang nakompirmang moapil sa re-enacment.

Ang maong mga sky divers pulos sakop sa Philippine Navy Marines Reservist sa 501st Naval Reserve Central Eastern Visayas.

Gibutyag ni Ison nga ang Philippine Army maoy mo-produce sa mga explosive nga maoy pabuthon atol sa reenactment diha sa baybayon.

Tulo ka barko sa Philippine Navy nga maglakip sa PG 393, PG 396 ug Diesel Fast Craft 353 ang gamiton sa reenactment ug laing tulo ka rubber boat. – BANAT NEWS