Lider sa industriya sa ASEAN mo-lecture

CEBU, Philippines - Ang mga lider sa nagkalainlaing industriya sa Asia mopasawo sa ilang mga kasinatian ug kahanas atol sa Board Lecture Series sa ika-25 nga ASEAN Social Securities Association (ASSA) Board Meeting nga ipahigayon sa Imperial Palace Hotel sa Sugbo karong Marso 24-26, 2010.

Ang maong panagtagbo gituohang tambongan sa kagatusan ka mga delegadong lokal ug international nga maglakip sa nagkalainlaing lider sa mga institusyon nga mosalmot sa maong kalihukan.

Ang mga mamumulong, sa Pre-ASSA Board Lecture Series maglakip kang Dr. Jose Jesus F. Roces ug Dr. Maria Elena Baltazar Herrera, FASP sa Asian Institute of Management (AIM) ug JP Morgan’s Eric Delomier ug Duncan Ken, diin silang tanan maoy mamumulong sa unang adlaw sa maong tigum.

Si Dr. Roces, maoy associate professor sa AIM, nga nag-specialize sa Marketing, Finance ug Human Resource kinsa mamulong kalabot sa Members Buy-in to Social Security Program.

Si Mr. Delomier, Vice President ug Client Portfolio Manager for Global; Fixed Income Group of JP Morgan, maoy motuki usab kalabot sa The Importance of Risk Aversion.

Si Dr. Herrera sa laing bahin mohatag og lecture kalabot sa Factors Affecting Funding Adequacy of Social Security Funds, A Long Term Perspective.

Siya sa pagkakaron maoy Associate Professor sa AIM, nagtudlo usab sa finance, risk management, organization development ug uban pa.

Si Mr. Duncan Klein, Executive Director and Head of Transition Management sa JP Morgan Worldwide Security Services maoy modumala sa lecture kalabot sa Transition Management.

Nagbasi sa Singapore, siya maoy responsable sa kaugmaran sa pamatigayon ug pagdumala sa transition mandate sa rehiyon sa Asia. – BANAT NEWS