CEBU, Philippines - Usa ka tawo nga nagpaabot sa iyang gi-order nga painit sa sulod sa usa ka kan-anan sa barangay Basak, dakbayan sa Lapulapu sa miaging kaadlawon gipusil angol sa wala hiilhing kriminal.
Ang biktima mao si Rene Pajarito, 23, ulitawo, nga nagpuyo sa maong dapit, samtang ang nagpusil gihulagway lang sa mga nakasaksi nga kasarangan ra ang panglawas.
Si SPO1 Frederict Islet sa Lapulapu City Police Station miingon nga gikan nga nagbilar ang biktima sa namatay niining silingan sa maong lugar ug mikuyog sa iyang mga higala paingon sa usa ka kan-anan kay namainit.
Apan samtang nagpaabot kini sa ilang gi-order nga painit, nalingaw kini og estorya sa iyang mga kauban dihang kalit lang miabot ang usa ka armadong tawo ug gipusil siya.
Human maigo sa dughan ang biktima, natumba kini sa yuta ug dihadiha mikaratel usab og dagan pahilayo sa maong lugar ang kriminal.
Ang biktima dali usab nga gihatod ngadto sa Mactan Doctor’s Hospital sa maong lugar.
Si SPO1 Islet miingon nga padayon pa nilang gipangita karon ang kriminal. – BANAT NEWS