CEBU, Philippines - Susihon sa mga awtoridad ang posibilidad nga ang pagkatap sa nubain karon sa Sugbo adunay kalambigitan sa nagsingabot nga eleksiyon ug ang halin niini gamiton sa usa ka politiko aron igasto sa Mayo 10, 2010 nga eleksiyon.
Ang kapolisan nagsuhid na karon sa gigikanan sa mga nubain nga nakit-an. Katapusang nakit-an mao ang 20 ka karton nga puno sa nubain ampules nadiskobrehan sa mga sakop sa Minglanilla Police Station sa gawas nga bahin sa usa ka videoke bar sa Lower Pakigne, lungsod sa Minglanilla.
Si Chief Insp. Jovito Canlapan, mibutyag nga gipalawman pa nila ang imbestigasyon kalabot sa nakit-an nilang nubain.
Matud ni Chief Insp. Canlapan nga ila usab nga gisusi karon kun ang nakit-ang mga nubain sa Lower Pakigne aduna bay kalambigitan sa 500 ka mga ampules sa nubain nga nasakmit sa kapolisan sa Mambaling Police Station gikan sa usa ka Celso Labiano nga taga Biak na Bato, Castillano, Negros Oriental.
Ang 20 ka karton adunay 90 ka ampules nga nubain ug laing 24 ka gagmay’ng karton ang adunay 100 ka ampules.
Si Chief Insp. Canlapan mibanabana nga mokantidad og P200 mil ang maong mga nubain nga gi-abandonar sa Lower Pakigne.
Dugang pa niya nga magkig-koordinar sila sa ilang labaw nga si Cebu Provincial Police Director Erson Digal kun unsay angayan buhaton sa 24 ka karton nga nubain.
Si Jessie Tabanao, tigpamaba sa Philippine Drug Enforcement Agency (PDEA-7) mibutyag nga dili sila makapanghilabot sa maong kaso tungod kay ang ilang gisubay nga mandato mao ang Akta Republika 9165 ang Comprehensive Dangerous Drugs Act.
Apan mipasabot si Tabanao nga kun ang lungsod o siyudad adunay ordinansa batok sa maong klase sa drugas, mahimo na silang makapasaka og kaso sa tawong makuhaan niini. – BANAT NEWS