CEBU, Philippines - Giawhag ni Department of Education (DepEd)-7 regional director Recaredo Borgonia ang mga ginikanan sa mga batang gikolektahan og amotan alang sa ilang graduation paghimo og pormal nga reklamo diha sa ilang buhatan batok sa mga magtutudlo.
Giluwatan ni Borgonia ang maong pamahayag human gibahaan na og daghang reklamo ang ilang buhatan gikan sa mga ginikanan batok sa dili mominus 23 ka mga pampublikong tunghaan dinhi sa dakbayan ug probinsya sa Sugbu.
Ang mga ginikanan mipasangil nga ang mismong mga magtutudlo sa pampublikong tunghaan diin magtungha ang ilang mga anak maoy namugos pagpaamot kay kun dili siya moamot dili sila makapaso sa graduation rites karung buwana.
Si Dr. Arden Monisit, Schools division superintendent sa Sugbu nga nahinabi sa Banat News miingon nga siya mismo nakadawat og reklamo sa mga ginikanan kabahin sa gipangayong amotan sa mga magtutudlo apan gipaagi lamang sa text message.
Matud pa ni Monisit nga usa sa iyang nahibaw-ang nangolekta og amotan mao ang usa ka tunghaan sa Sogod apan nagdumili kini sa paghingalan sa maong tunghaan.
Giklaro ni Monisit nga dili pinugsanay ang pagpangayo og amotan gawas lamang kun nasabutan kini sa Parents Teachers and Community Association (PTCA), naglakip na ang pagpasul-ob og toga sa mga batang mogradwar.
Nunot niini giawhag ni Borgonia ang mga ginikanan nga mobarug sa reklamo sa mga magtutudlo aron ilang maimbestigahan ug mapahamtangan og silot. (Rey Pasaporte) (BANATNEWS)