Gipatay sa disko

CEBU, Philippines - Patay diha-diha taliwala sa diskohan ang usa ka mag-uumang kalit gipusil samtang nagsayaw nunot sa pagsaulog sa tinuig nga kapistahan sa sitio Lower barangay Caliongan lungsod sa Dalaguete niadtong Domingo sa alas 5:00 sa sayong buntag.

Ang biktima mao si Saturnino Amay Bustamante, 25, molupyo sa sitio Tubod sa barangay Obong sa Dalaguete samtang wala pa matumbok sa kapolisan ang mamumuno niini.

Matud pa ni SPO4 Mansueto Lopez sa Dalaguete Police dihang nahinabi sa Banat News ang biktima ug mga barkada mao nalay nahabilin nga nag-inom samtang nagsayaw-sayaw sulod sa diskohan nga hapit na unta mahuman niadtong tungura.

Apan usa ka wala mailhing tawo ang milipot sa luyong bahin sa biktima nga nagbitbit nang daan og pusil dayung dul-it og pusil ang bukobuko niini.

Human sa lanog nga buto sa armas nakalitan ang mga kaubanan niini ug dayung sibat pahilayo sa mamumuno og dangtan ug pipila ka gutlo nahagba ang biktima sa semento ug namatay paglabay sa pipila ka gutlo ug wala na madala pa sa tambalanan.

Ang kapulisan padayon pa sa ilang hot pursuit operation pagsikop ug pag-ila sa gikatahapan samtang padayon pa usab nga gi-imbestigar ang motibo sa krimen.

Sentro sa gisubay nga anggulo ang posibilidad nga personal nga kabangian ang motibo sa pagpusil kang Bustamante.   (BANATNEWS)