Oposisyon sa Lapulapu way ikabuga - Radaza

CEBU, Philippines - Walay lig-ong oposisyon sa dakbayan sa Lapulapu nga makasakbang sa mga kaalyado ni encumbent Lapulapu City Mayor Arturo Radaza sa umaabot nga piniliay.

Si Lapulapu City Association of Barangay Captains ABC President Leo Mercado sa pakighinabi sa Banat News mipadayag nga wala silay gikunsiderar nga lig-ong oposisyon sa dakbayan sa Lapulapu sa umaabot nga piniliay.

Matud pa ni Mercado bisan pa kung usahon ang mga kampo sa ilang kaatbang sa politika sa dakbayan sa Lapulapu dili sila makabungkag sa ilang partido gumikan kay nagkahiusa sila ug suportado sa mga kapitan.

Gihulagway ni Mercado ang panagbingkil ug wala’y pagsinabtanay sa grupo ni Efrain “Jun” Pelaez ubos sa partido Liberal, Junard “Ahong” Chan ubos sa NPC ug Isabelito Darnayla nga pulos magpapiling mayor nagpakita lamang sa ilang dili maayong pagdumala sa ilang mga sakop.

Samtang igo lamang mipahiyom si Lakas-Kampi CMD mayoralty candidate Paz Radaza sa nahitabo sa iyang mga kaatbang ug masaligong mao kini magtuboy kaniya sa kadaugan.

Kampante usab kining siya maoy suportahan sa mga botante ug mitambag sa mga kaatbang nga maghiusa kun gusto silang mokumbinser sa mga taga Opon. (Bong Soriano)    (BANATNEWS)