CEBU, Philippines - Hingpit na ang pagpangandam sa kapolisan ug Philippine Coast Guard (PCG) sa Sugbo alang sa pagpatuman sa kahusay ug kalinaw ug kasigurohan sa magdasok nga pasahero karong umaabot nga Semana Santa.
Ang tahas sa PCG mao ang pagpatunhay sa kalinaw sa mga pasahero nga mosakay o kaha manaog sa barko diha sa mga pantalan ning siyudad.
Kauban usab sa taga PCG mao usab ang mga barangay tanod ug BIN sa mga barangay nga nagsakop sa mga pantalan ning siyudad.
Kini aron masalbar ang mga pasahero gikan sa mga mangingilad, mangunguot, ug usahay mga drayber sa taxi nga mangunay og tulis sa ilang mga pasahero.
Samtang si Senior Superintendent Erson Digal, director sa Cebu Provincial Police Office miingon nga ang “Task Force Igmat” iya usab nga gitukod aron maoy maniid sa mga illegal nga kalihokan sa tibuok lalawigan.
Dugang pa ni Digal nga iyang gimandoan ang iyang mga hepe nga bisan ang mga nagkadaiyang sugal sama sa mahjong, baraha, hantak ug tigbakay ug uban pa, angay bantayan ug kontrolahon sa panahon sa pagsaulog sa Semana Santa. – BANAT NEWS