CEBU, Philippines - Mga gang sa dakbayan sa Lapulapu dili susama ka gubot sa mga gang sa ubang dapit sa Metro Cebu apan gihulagway ni Lapulapu City Police Office director Sr. Supt. Mariano Natu-el Jr. nga dako ang papel sa barangay officials ug tanod sa pagmentinar sa kahapsay ug kalinaw.
Si Natu-el dihang gikahinabi sa Banat News nagkanayon nga ang mga gang sa Lapulapu mga chapter gihapon sa mga gang sa ubang parte sa Metro Cebu apan ang kagubot ug krimen nga ilang gikalambigitan pulos personal ug walay labot ang ilang mga grupo.
Ang dakbayan dunay curfew ordinance nga gipatuman nga nagdili sa mga minor nga maglaroy-laroy sa kadalanan sugod alas-11 sa gabii hangtud sa kaadlawon.
Kahinumduman nga niadtong milabay'ng semana, usa ka batan-ong sakop sa gang ang gipatay ug gi-gang rape usab ang uyab niini sa mga gituuhang miyembro usab sa laing gang.Ang insidente nahitabo sa hilit nga dapit.
Sa dakbayan sa Sugbu, ang Cebu City Police Office mibuhi pag-usab sa Anti-Street Hoodlum Task Force(A-Shot) aron mapakgang ang subling paggara sa mga gang members nga mikalas na usab og mga kinabuhi ug nalambigit sa nagsunod-sunod nga tulis sa siyudad.
Matud pang Natu-el ang lima ka mga police stations nga aduna ray walo ngadto sa siyam ka polis, mi-doble na sa pagpatrolya apan miangkong dili tanang suok sa dakbayan ang ilang masudlan gumikan sa kakulang sa kadalanan ug kakulang sa ilang mga tawo.
Ang Lapulapu aduna ray 160 ka mga sakop nga maoy mobantay sa 292,000 ka mga residente, kini nangahulugang sa matag usa ka polis bantayan niini ang seguridad sa 1,400 ka mga residente gikan sa 30 ka barangay.
Sumala pa niya nga ang husto untang ratio mao nga usa ka polis sa matag 500 ka mga tawo. Sa pagkakaron, ang kapolisan giabagan sa gibana-banang 600 ka mga barangay tanod sa dakbayan nga maoy makasulod-sulod sa mga sudlonong bahin sa kabarangayan nga di maabot sa regular nga patrolya sa mga polis.
Si ABC president Mercado sayo niining buwana mipahibalo sa paglusad sa ilang Barangay Peace Action Team nga diha gisugdan sa iyang barangay sa Pajo.
Tumong niini mao ang paghingusog sa kampanya batok kriminalidad sa ilang kabarangayan nga gisuportahan usab sa kapolisan. – BANAT NEWS