Bucao misimpatiya kang Belleza

CEBU, Philippines - Si Bise Mayor Alan Bucao sa dakbayan sa Talisay mipadayag kagahapon sa iyang simpatiya ngadto sa iyang kaatbang nga si kanhi Bise Mayor Aberdovey Belleza.

Si Bucao nga nahinabi sa Banat News  nagkanayon nga gibati na karon ni Belleza ang iyang (Bucao) gibati kaniadto dihang migawas siya sa landong sa administrasyon.

Si Belleza kinsa kaniadto, maoy diha sa silong sa administrasyon ug karon nahimo nang oposisyon nagkanayon nga sobra ang pamolitika nga gibuhat karon sa mga namunoan sa siyudad.

Kini sa dihang si Konsehal Arturo Bas mipasar og mosyon niadtong Martes nga nag-awhag sa mga sakop sa konseho nga moluwat sa ilang katungdanang pagka-tsirman sa nagkalainlaing komitiba sa konseho aron ang mga mikandidato makakonsentrar sa ilang pagpangampaniya.

Sa maong mosyon ni Bas nga giuyonan usab dayon sa kadaghanan, dako kaayo og pagtuo si Konsehal Shirley Belleza nga asawa ni Aber Belleza, nga didto kaniya ipunting kining maong lakang kay gidudahan siyang mibali na ngadto sa oposisyon.

Apan gipanghimakak ni Bucao kining maong pagduda tungod kay dili lamang si Belleza ang apiktado niini kundili ang tanang konsehal nga naghupot og komitiba pulos gihuboan sa katungdanan.

Sa samang higayon gipanghimakak usab niya ang katahap nga scripted kining maong lakang ug gisabotan sa mga konsehal nga iya sa administrasyon.

Apan hinuon daan nang nanumpa si Belleza nga bisag unsay mahitabo dili niya buhian ang iyang pagka-tsirman sa komitiba nga iyang gihuptan.

Kini tungod kay alang kaniya mabaw ra kaayo ang mga rason sa iyang kaubang mga konsehal sa ilang pagluwat sa ilang committee chairmanship.

 Apan miingon si Bucao nga dili diay lalim sa usa ka konsehal kung dili siya tugyanan og komitiba   sama usab kaniya (Bucao) kaniadto nga dihang wala siya hatagi og komitiba sa mga sakop sa administrasyon, wala niya hisabti ang hilabihang kasakit   ug kahiubos nga iyang gibati.

Nasugamak usab niini si Konsehal Sergio Restauro kinsa gihukasan sa iyang pagka-tsirman sa   komitiba sa panglawas kay gidudahan kining midapig ngadto sa kaatbang sa administrasyon.

Kahinumdoman nga sa election niadtong tuig 2007 si Bucao ug Belleza may kasilo sa usa ug usa, apan matud ni Bucao wala siya’y personal nga kayugot ngadto sa konsehala. (Brenda D. Batuto)    (BANATNEWS)