Dumpit i-arraign sa kasong murder ugma
CEBU, Philippines - Ang kontrobersiyal nga polis sa siyudad sa Sugbu nga si SPO1 Adonis Dumpit gikatakdang i-arraign ugmang adlawasa kasong murder tungod sa pagpatay sa usa ka 17-anyos nga suspetsadong tulisan nga si Ronron Go niadtong tuig 2005.
Kini human gibasura ni Regional Trial Court Judge Ester Veloso ang motion for reconsideration sa abogado ni SPO1 Dumpit nga nag-aghat sa korteng usbon ang desisyon sa korte nga nagdumili sa pag-downgrade sa kasong murder batok sa nahisgutang polis ngadto sa kasong homicide na lamang.
Nasayran nga niadto pa untang Marso 1 i-arraign si Dumpit sa kasong murder apan gioktaba kini ni Judge Veloso aron dunggon ang motion for reconsideration nga giduso sa abogado ni Dumpit nga si Atty. Pedro Leslie Salva.
Si Salva mitumbok diha sa iyang motion for reconsideration nga si Dumpit igo lamang nagtuman sa iyang katungdanan isip polis sanglit ang namatay’ng biktima maoy miuna og tion sa dala niining armas dihang gigukod kini ni Dumpit.
Si Dumpit sa sayo pa daan nang mihimakak nga iyang gituyo ang pagpatay kang Go ug padayong miinsister nga self defense lamang ang iyang gibuhat.
Apan wala kini hatagi og gibug-aton sa korte bisan pa og ang findings reinvestigation sa Ombudsman of the Military and Other Law Enforcement Offices (MOLEO) namatud-ang kasong homicide lang ang angayang ipasaka ngadto sa Korte ug dili murder.
Si SPO1 Dumpit kinsa anaa karon sa kustodiya sa Criminal Intelligence and Detection Group kon CIDG-7 gipaabot nga mosalikway sa maong kaso atol unya sa arraignment karong Lunes.
Si Salva kauban ang mga bag-ong abogado sa depensa nga sila si Atty. Frank Malilong ug Atty. Julius Ceasar Entice mutambong usab sa maong hearing ug mohimo sa mga kinahanglanong mosyon paglaban sa ilang kliyenteng si Dumpit. (BANATNEWS)
- Latest
- Trending
