Nag-wild nga 'kano gipabayad sa danyos sa abyon, naospital

CEBU, Philippines - Mokabat sa 620 dolyares ang kantidad sa bayranan sa Amerkanong giingong nag-wild ug mipuspos sa bintana sa giluwanang abyon sa Philippine Air Lines sa milabay’ng kaadlawon gikan sa kaulohan padung dinhi sa Sugbu.

 Sa pakighinabi ni Jovelyn Hampton asawa ni Rex Maybert Hampton (suspetsadong nag-wild) sa Banat News, gipabayad sila sa PAL og 620 dolyares sa nadanyos nga window pane sa   abyon.

 Samtang gipasabot ni Jovelyn nga posibleng nasobrahan sa giinom niini nga tambal sa hypertension ug anti depressant ang iyang bana ug gumikan kay pressurized ang maong abyon hinungdan sa pag-init sa ulo niini.

 Gani unang higayon kini nga nahitabo sa ilang panag-away nga ang hinungdan mao lamang ang seatbelt nga gustong tangtangon ni Hampton tungod kay adunay tawong buot nga mopatay kaniya.

Dihang wala mosugot si Jovelyn nalagot ni Hampton ug misunod ang komosyon nga misantop sa pagbukbok niini sa usa sa mga pasahero ug sa bintana sa abyon.

 Human nga gipasaka sa Police Center for Aviation Security kon PCAS 7 ang kasong Malicious Mischief gumikan sa danyos niini gitugyan ngadto sa Lapulapu City Police Office si Hampton alang sa pagbilanggo kaniya.

 Mga 9:30 sa milabay’ng gabii mihangyo si Jovelyn nga i-admit ngadto sa tambalanan ang iyang bana gumikan sa gibati niini sa iyang panglawas nga gitugutan usab ni Sr. Supt. Joselito Salido ang hepe sa PCAS-7 ug gidala kini sa Chong Hua hospital apan gwardyado.

 Matud pa ni Salido, dugang kaso ang ipasaka sa Civil Aviation Authority of the Philippines kon CAAP gumikan sa maong hitabo ubos sa Art. 9497 tungod kay gibutang ni Hampton sa peligro ang kinabuhi sa ubang mga pasahero.

 Apan si CAAP Cebu Director Agnes Udang mipadayag nga ila kining itugyan ngadto sa ilang ulohang buhatan pinaagi ni CAAP Director General Alfonso Cusi.

Kahinumduman nga si Rex Hampton, 80, gisikop sa mga flight crew sa PAL Flight PR843 samtang naglupad padulong dinhi sa Sugbu gikan sa Manila dihang kalit kining nag-wild. (Bong Soriano)   (BANATNEWS)