180 ka piniriso mobotar sa Mandaue sa Mayo

CEBU, Philippines - Dunay 180 ka binilanggo sa Mandaue City Jail ang rehistradong botante sa Comelec sa maong dakbayan nga gikatakdang makabotar sa national ug local election karong Mayo 10 niining tuiga.

Si JO1 Blanche Alino nga nahinabi sa Banat News miingon nga dunay 693 ka piniriso ang bilanggoan sa Mandaue apan 180 lamang ang kwalipikadong makabotar human sa pagsusi sa ilang rekisitos.

Si Jail Warden Simeon Dolojo mipadala na og hangyo sa Comelec nga mopadala nalang og mga makina ug personnel diha sa ilang pasilidad aron makabotar ang ilang mga binilanggo.

Ang mga mahimong makabotar nga bilanggo mao kadtong wala pay hukom sa mga kaso ug kadtong kansang mga kaso padayon pang giapelar sa Appellate Courts.  - Romeo Limpangog