Maui, Jennifer mitambong sa Women's Congress

CEBU, Philippines - Gituman gyud sa duha ka mga miyembro sa Viva Hot Babes nga sila si Maureen Ann Rodriguez nga naila sa pangalang Maui Taylor ug Jennifer Lee ang pagtambong sa 10th Women's Congress nga gipahigayon sa Cebu International Convention Center kon CICC sa dakbayan sa Mandaue kagahapon.

Sa maong kalihukan gipasiugdahan ni Gob. Gwendolyn Garcia, Provincial Board member Agnes Magpale, ang chairwoman sa Women, Family and Minors committee sa Hunta Provincial ug ubang mga kababayen-ang mga lider.

Si Lee namahayag atubangan sa gatusan ka mga kababayen-an nga nahimo niyang inspirasyon pag-usab sa iyang kinabuhi ang pagpahigmata kaniya sa lalawigan.

Si Lee ug Taylor gipasakaan og kaso sa lalawigan tungod sa pagsayaw nila sa bikini open sa usa ka beach resort sa isla sa Bantayan atol sa Semana Santa niadtong miaging tuig tungod sa paglapas sa ordinansa sa lalawigan kabahin sa pagprotiher sa dignidad sa kababayen-an.

Si Taylor sa iyang bahin mihulagway kang Garcia nga labing maayong modelo sa kababayen-an tungod sa katakos niini pagdumala sa lalawigan ug pagpabarog sa katakos sa kababayen-an.

Mipasalamat ang duha pagpili kanilang ambassadress of women's rights sa Sugbu ug misaad nga hangtud sa hangtud silang manalipod sa katungod sa mga kababayen-an.

Si Garcia nagkanayon nga usa ka dakong hagit sa iyang pamunoan ang kakulang sa imprastraktura ug pagtagad sa kalikupan sa probinsiya sa Sugbu, ug ang padayong pagsalig sa publiko maoy nahimo niyang giya pagpatuman niini. - Chester Abadilla (BANAT NEWS)