Kopya sa SC wa madawat ni Benhur

CEBU, Philippines - Wala pa hingpit madawat ni Kongresista Benhur Salimbangon sa ika-upat nga distrito sa lalawigan sa Sugbo ang kopya sa desisyon sa Korte Suprema nga nagmando pagpapas sa iyang ngalan apil na ang iyang mga staff sa payroll list sa Kongreso sugod karong bulana.

Gani miduso na sa ilang komentaryo si House Speaker Prospero Nograles sa Korte Suprema nga nag-ingong sugod niadtong bulan sa Pebrero atol sa katapusang sesyon gipapas na ang ngalan ni Salimbangon sa payroll list sa Kongreso.

Apan si Salimbangon sa iyang bahin, miingon nga gawas nga wala pa siya makadawat og kopya sa maong kamanduan dili na usab kana maoy importante ug prayoridad nila sa pagkakaron.

Kini tungod kay natapos na ang sesyon sa Kongreso ug wala nay oath taking nga mahitabo bisan pa og gi-proklamar sa Korte Suprema ang iyang karibal nga si kanhi Bogo Mayor Celestino “Tining” Martinez III nga maoy tinuoray'ng mananaug pagkakongresista sa 2007 election.

Matud pa ni Salimbangon nga gitutokan niya ang nagsingabot nga kampanya alang sa eleksiyon karong petsa 10 sa Mayo nga diin subli silang mag-atbang si Martinez.

 Alang kang Salimbangon ang importante lang niya nga makahibawo ang publiko ilabi na ang mga molupyo sa kwarto distrito kun si kinsa ang mihimo og pagpanikas sa milabay'ng eleksyon.

Gibasehan ni Salimbangon ang pagpasaka niya og kaso sa korte batok sa election officer sa Bogo nga si Jose Menguez ug sa treasurer nga si Rhet Menguez nga gihulagway niyang maoy nagmaniobra sa mga resulta sa balota gikan sa maong lugar sa milabay'ng eleksyon ug Dugang ni Salimbangon nga dili gihapon makonsiderar nga si Tining mao nay kongresista hulip niya tungod kay wala pa kini makahural. – BANAT NEWS