Gipatan-aw sa uyab gi-gangrape

CEBU, Philippines - Gipatan-aw paglugos sa uyab dayon gipa-um-om sa sumbohan sa armas ug gipusil patay ang sakop sa Crips gang nga napalgang patay niadtong milabay'ng Domingo.

Kini maoy pamahayag sa usa sa pito ka mga suspek nga nangadakpan niadtong milabay'ng gabii ug kagahapon sa kaadlawon sa gihimong hot pursuit operation sa Lapulapu City Police Office batok sa mga miyembro sa gang.

Unang nasikop sa kapolisan mga alas 5:30 sa milabay'ng hapon ang 16-anyos nga sakop sa Crips gang sa Saac 1, barangay Buaya, dakbayan sa Lapulapu kinsa maoy mitug-an sa mga kaubang responsable sa maong krimen.

Tungod niini, nadakpan si Joel “Buskalo”Ramirez, 19, taga sitio Dumpsite Pool sa Bankal dakbayan sa Lapulapu nga sakop sa Bloods gang kinsa mao usab ang mitug-an sa uban pang kaubanan nga sila si Jeffrey “Saddam” Cabilao, 19, taga sitio Saac 1, Buaya kinsa maoy gitudlong mipusil kang Russel Booc,16, nga uyab sa 16-anyos nga dalagitang gi-gang rape sa grupo niadtong petsa 14 ning bulana.

Nasundan pa ang pag-aresto sa lain pang suspek nga nagpangidaron og 15, ug tulo ka 17-anyos nga pulos miyembro sa gang.

Atol sa imbestigasyon ni SPO2 Frederick Eslit sa kapolisan sa Crime Against Person Desk, ang mga suspetsado pulos mitudlo kang Cabilao nga maoy mipatay kang Booc ug maoy mipugos kanila paglugos sa dalagita.

Si Ramirez mipadayag nga dili unta sila moapil sa paglugos sa maong babaye apan gitionan sila ni Cabilao og armas hinungdan nga tanan sila milugos sa dalagita gawas lang sa usa ka 15-anyos nga hugot gyung mibalibad.

Sumala pa sa mga suspek nga human lugosa ni Cabilao ang dalagita giduol niini si Booc ug mipaum-om sa armas dayong pusil niini hinungdan nga nanagan sila palayo.

Wala pa gyud maestablisar og maayo sa kapolisan ang motibo sa krimen apan base sa mga pasiunang nakuhang impormasyon gikatahong si Booc maoy sumusunod nga mamahimong lider sa ilang gang ug gisuyaan.

Matud pa ni Lapulapu City Police Office Director Sr. Supt. Mariano Natu-el Jr., kasong pagpatay ug pagpanglugos ang atubangon ni Cabilao ug Ramirez lakip na ang tulo ka 17-anyos.

Ang piskaliya na maoy modesider subay sa pagsusi sa Department of Social Welfare and Development kun naa na sa ensaktong kabuot ang mga menor, samtang ang 15 ug 16 anyos itugyan ngadto sa DSWD. – BANAT NEWS