BHWs nanawagan kang Loren

CEBU, Philippines - Mga barangay health workers (BHWs) nanawagan kang Senador Loren Legarda, nga kandidato sa pagka-bise presidente ilawom sa National Peoples Coalition atol sa pagduaw niini sa Pardo Public Market ug Tabunok Public Market.

Si Hermelinda Abadiano, national president sa BHW of the Philippines Confederation nagkanayon nga usa sa ilang giyangungo kang Legarda mao ang tinuoray'ng implementasyon sa Akta Republika 7883 kOn “Barangay Health Workers Benefits & Incentives.”

Ang maong balaod nagsigurong mahatagan og honorarium sa mga BHWs, educational scholarships sa mo-qualify nga mga anak, ang dili na pagpakuha kanila og service eligibility basta kwalipikado ug accredited nga mga BHWs.

Si Legarda kinsa nangangkong kampeyon sa mga BHW nagkanayon nga duna na siya’y pending bill aron mapataas ang mga honorarium sa maong sector.

Matud niini nga gusto niyang madugangan sa nasudnong pundo ang kasamtangang gidawat nga honorarium sa mga BHW pinaagi sa Department of Health (DOH) ug ang maong ahensya maoy motunol niini ngadto sa mga BHW sa kabarangayan.

Gawas niini, gusto usab ni Legarda magpadayon ang skill trainings aron makat-on sa midwifery ug care giving courses aron mas makatabang pa sa mga residente ngadto sa kalungsoran nga walay mga doktor, midwives ug nurses.

Dunay sobra sa 300,000 ka mga BHW sa Pilipinas nga maoy frontliners sa pagtabang sa mga masakiton ug ubang mga problema sa panglawas sa katawhan diha sa kalungsoran.

Samtang atol sa pagduaw ni Legarda kagahapon sa buntag sa merkado publiko sa barangay Tabunok, dakbayan sa Talisay susamang mga yangungo gihapon sa mga vendors sa nabisitahang kamerkaduhan ang iyang nadunggan. – BANAT NEWS