Summer jobs sa CH gisaway sa Magdalo

CEBU, Philippines - Pagkuha og mas daghang estudyane alang sa summer jobs sa dakbayan sa Sugbu gisaway ni Magdalo congressional bet sa north district nga si Francisco Ashley Acedillo.

Si Acedillo namahayag kabahin sa gihulagway nga giingong “vote-buying spree” sa dakbayan gamit ang Special Program for the Employment of Students (SPES).

Sumala pa sa report, ang dakbayan nagtinguhang mokuha og 2,200 estudyante karong summer alang sa SPES kumparar sa 681 ka tinun-ang gi-hire sa milabay’ng summer.

Giangkon hinuon ni Acedillo nga wala siya’y nakitang dautan niini kun ang tumong mao gyud ang paghatag og dugang income sa mga gustong magkolehiyo, apan dako ang iyang pagtuong ang timing niini gipasakay lang gyud tungod sa piniliay.

Si Acedillo nga maoy nasudnong tigpamaba sa Samahang Magdalo nagkanayon, nga kun siya hatagan og kahigayunan sa mga botante sa north district mopanday siya og usa ka balaudnon sa Kongreso nga pagatawgong Cebu City Comprehensive Development Act.

Pinaagi niining maong balaudnon, makaestablisar ang dakbayan og kasaligang sistema nga maoy himuong basehan alang sa galastuhanan alang sa social services ug public infrastructure.

Kini usab maoy magpakgang nga dili magamit ang pundo sa dakbayan sa mga gipangtawag nga mga “pet projects” sa mga politikong ang tinguha lamang nga mailhan sa mga botante.

“Aron dili na magpatuyang ang kinsa mang opisyal sa city government og gasto sa kwarta sa gobiyerno. Kini nga plano para sa kalambuan sa siyudad nga akong gisugyot mao pu’y magpatuman og disiplina sa pag-apud-apod sa parehong kongresista sa north ug south district sa ilang pork barrel funds,” matud pang Acedillo.

Ang balaudnon ni Acedillo maglangkob unya sa pito ka prayoridad, kini mao ang ekonomiya, kinaiyahan, pamilya ug panglawas, Urban Revitalization, Education, participatory governance, ug public order and safety.

Nagtuo siyang pinaagi niini ug panagtambayayong ug kooperasyon sa dakbayan ug mga stakeholders sa business sector, academic, professional, tigpatuman sa balaod, labor, kabataan, kababayen-an, urban poor, ug religious sectors dili imposibleng dili makab-ot ang kalamboan. – BANAT NEWS