Dispatser gipatay

CEBU, Philippines - Patay ang usa ka dispatcher dihang kalit lang gipusil alas 12 pasado ang takna sa miaging tungang gabii sa sitio Lugsongon sa barangay Basak, dakbayan sa Mandaue.

Ang namatay mao si Antonio Ycong, 22 anyos, ulitawo nga nagpuyo usab sa nahisgotang lugar ug ang nagpusil mao ang wala hiilhing duha ka mga lalaki nga nagsakay og motorsiklo.

Si SPO1 Frederict Islet sa homicide section sa kapolisan sa maong dakbayan miingon nga subay sa gitug-an sa pipila ka mga tawo sa maong dapit ilang nahibaw-an nga nakighinabi pa ang biktima sa usa ka taxi drayber atubangan sa usa ka botika sa maong dapit.

Gihunongan kini sa wala hiilhing lalaki nga nagsakay og motorsiklo ug kalit lang gipusil sa backrider ang ulo ug uban pang bahin sa iyang kalawasan.

Matud pa ni SPO1 Islet   nga dali nga gidala ang biktima sa Mactan Doctor Hospital nga nahimutang usab pipila ka metros nga gilay-on sa crime scene.

Si SPO1 Islet miingon nga dali kining giatiman sa mga doktor sa maong tambalanan apan gideklarar kini sa mga doktor nga dead on arrival.

Ang kapolisan nagpadayon pa sa ilang pakisusi alang sa pag-ila sa mga suspetsado ug ang hingpit na usab nga pagpasaka og kaso ngadto sa korte batok sa mga suspetsado nga nakasibat pahilayo sa maong dapit. – BANAT NEWS