Anak ni Kap nakadaro gireklamo

CEBU, Philippines - Gireklamo sa mga konsehal sa Tuburan ang anak sa kapitan sa barangay Colonia nga nakaligis-patay og lima ka mga tawo, sagad niini mga bata, atol nga nagbilar sa barangay Fortaliza sa maong lungsod niadtong Biyernes sa gabii.

Si Konsehal Marie Tabotabo mipadayag sa iyang reklamo sa dihang nahinabi sa Bantay Radyo batok kang Anthony Cabintoy, anak ni Kapitan Alice Cowley sa Colonia. Ang Nissan Frontier gidaro ngadto sa mga tawong nagbilar daplin sa karsada.

Sumala pa ni Tabotabo nga wala ipaubos og liquor test ug drugtest si Cabintoy nga gihulagway sa konsehal nga notado nang tiggamitan og drugas ingon man palahubog sa ilang lugar.

Dugang reklamo ni Tabotabo mao ang expired nga driver’s license ni Cabintoy ug walay rehistro ang sakyanan.

Si Tabotabo nga kaalyado kaniadto ni Mayor Boyet Suezo namasangil hinuon sa kasamtangang administrasyon nga nagpabaya pagsumpo sa naghitak nga suliran sa kaso sa pagpangawat ug drugas sa lungsod nga miresulta pagtumaw sa pipila ka kaso sa panglugos.

Nasayran nga si Kapitan Cowley kandidato kini pagka-konsehal ubos sa line-up ni Bise Mayor Rosemarie Suezo. Samtang si Tabotabo nagpasubli usab sa pagka-konsehal ubos sa line-up sa magpapatigayong Aljun Diamante.

Apan daling nangatarungan ang kapolisan sa Tuburan nga wala mapaubos og drug-test ingon man liquor test si Cabintoy tungod kay human sa hitabo misibat kini tungod sa iyang kahadlok sa mga kabanay sa mga biktima nga iyang naligsan. Sa sunod buntag na kini mitahan sa iyang kaugalingon ngadto sa kapitan sa barangay Molobolo nga si Rommel Sayson.

Giangkon hinuon ni SPO3 Carlo Canseko, imbestigador sa Tuburan Police Station sa dihang nahinabi sa Banat News nga nakadawat sila og report may labot sa giingong paggamit og ginadiling drugas sa anak sa kapitan apan wala silay igong ebidensiya niini.

Dugang ni SPO3 Canseko nga niadtong Martes gidala nila sa Kapitolyo si Cabintoy alang sa inquest proceedings human napasakaan og kasong reckless imprudence resulting to multiple homicide.

Samtang ang Nissan Frontier ni Cabintoy gitakda usab kining i-turn-over ngadto sa Land Transportation Office (LTO).

Nahimong tensiyonado ang nagsingabot nga eleksiyon sa Tuburan tungod sa panag-atbang ni Bise Mayor Suezo ug Diamante.