Igsuon sa konsehal sikop sa buy bust

CEBU, Philippines - Igsuon og konsehal sa siyudad sa Talisay nga giingong notadong drug dealer sa kalungsoran sa Sugbo ug Dumaguete nadakpan kagahapon sa kaadlawon atol sa buy-bust operation sa Regional Anti-Illegal Drug and Special Operation Task Force (RAIDSOTF). Laing tigpayuhot og ginadiling drugas sa siyudad nadakpan sa buy-bust operation sa Investigation and Detection Management Branch (IDMB).

Ang nasikop didto sa sitio Luwan-Luwan, barangay Poblacion, Carcar mao si Hermigildo Baclay Capala “alyas Dodong Capala,” 60, molupyo sa Cansojong, Talisay. Si Dodong Capala igsuon ni Konsehal Aaron Capala sa siyudad sa Talisay.

Si Insp. Glenn Hefi, team leader sa RAIDSOTF, nagkanayon nga nakadawat sila og impormasyon nga si Dodong Capala anaa magsuroy sa Carcar hinungdan nga ila kining giplanohan.

Ginamit ang boodle money nga P500, gitunol ni Dodong Capala ang 25 gramos nga shabu nga nagkantidad og P150 mil ngadto sa poseur buyer nga polis.

Si Dodong Capala dali untang milakaw apan gisikop kini sa kapolisan.

Sumala pa ni Insp. Hefi nga sukad pa niadtong 2005, si Dodong Capala nalista isip number 1 sa Order of Battle sa RAIDSOTF.

Dugang pa ni Insp. Hefi nga si Dodong Capala maoy tig-apod-apod og shabu sa kalungsoran sa Sugbo, Dumaguete, Negros ug Leyte. Sumala sa impormasyon nga nakuha ni Insp. Hefi, ang shabu gikuha gikan sa Mindanao.

Si Capala mihimakak hinuon sa gialegar sa kapolisan nga siyay pinanser sa pagdagan sa iyang igsuon isip konsehal sa Talisay. Matud niya nga ang anak sa iyang igsuon pulos nagbase sa gawas sa nasud.

Mibutyag si Capala nga labing unang higayon nga nasikop siya sa kapolisan sa kasong paghupot og drogas tungod kay niadtong tuig 1990-1991, nasikop siya tungod sa masiao.

Si Insp. Hefi nagkanayon nga si Capala nag-usab-usab sa iyang pagkatawo hinungdan nga naglisod sila pag-ila niini.

Ang Capala Group padayon pa karun nga gisundan sa kapolisan nga gidudahang maoy dako nga grupo nga mikatap sa lalawigan.

Sa miaging gabii, nasikop usab sa kapolisan sa syudad sa Sugbo ang bigtime drug pusher sa sitio Lower Kawayan, barangay Sambag 2.

Ang nasikop mao si Frederick Villamala, 28, molupyo sa maong lugar, nga gitumbok usab nga usa ka “gun for hire.”

Matud pa ni Chief Insp. George Ylanan sa IDMB nga atol sa buy-bust operation, mibaligya kanila og medium pack nga shabu nga nagkantidad og P40 mil.

Ginamit ang boodle money nga P1,000, gitunol sa suspetsado ang gituohang shabu ngadto sa polis nga nagpakaaron-ingnong pumapalit.

Ang suspetsado midagan paingon sa iyang balay ug didto nasikop kini tungod sa kadaghan sa polis nga mipahigayon sa operasyon.

Tungod sa report nga kanunay’ng armado si Villamala, miabag sa operasyon ang Intelligence Section sa Fuente Police Station, duha ka team sa Special Weapons and Tactics (SWAT).

Nakuha sulod sa balay ni Villamala ang duha ka pakete sa shabu, mga drug paraphernalias, ug upat ka high-powered nga armas uban ang bala niini susama sa Colt AR-15 Sub-Machine Gun uban sa duha ka long banana type magazine nga adunay 32 ka buhing bala sa .9mm, Colt .45 Pistol nga adunay pito ka buhing bala, Colt .45 pistol nga adunay 10 ka buhing bala, Colt MK IV nga adunay 11 ka buhing bala.

Dugang pa ni Chief Insp. Ylanan nga ang maong mga armas gikatahong maoy paabangan ni Villamala sa mga tulisan ug gun for hire ug gani mao usab ang iyang gamiton kun adunay tipion. – BANAT NEWS