Barcenas nahimangod sa desisyon sa Supreme Court

CEBU, Philippines - Ang kanhi pangulo sa Integrated Bar of the Philippines (IBP) Cebu City Chapter wala makauyon sa gipagawas nga desisyon sa Korte Suprema nga nagtugot kang Presidente Gloria Macapagal Arroyo nga makatudlo og bag-ong chief justice hulip sa moritero nga si Chief Justice Renato Puno.

Matud pa ni manlalaban Democrito Barcenas, kanhi presidente sa IBP Cebu City Chapter, nga ang disisyon sa labaw'ng hukmanan kagahapon sa buntag nga nagtugot sa Pamuno Nasud nga makatudlo og bag-ong hepe sa hustisya ,nagpakita lamang nga wala nay paglaum nga mapaabot pa gikan sa kinabag-ang mga hurado sa Korte Suprema.

Si Barcenas miingon nga wala mahisubay sa Batakang Balaod ang disisyon sa Korte Suprema nga nagtumbok nga mga 60 ka adlaw sa dili pa ang presidential election, ang presidente dili na makatudlo pa og mga opisyales sa nagkadaiyang buhatan sa gobyerno lakip na ang pagtudlo sa mohulip ni Chief Justice Puno kinsa moretiro karong Mayo 17.

Matud pa ni Barcenas nga alang kaniya gamay lamang kaayo ang mapiling tarong ug ligdong mga mahistrado sa labaw'ng hukmanan.

Iyang gihulagway nga tungod sa maong disisyon ang Korte Suprema nawad-an na gyud sa iyang pagka-independente gikan sa executive branch.

Sa iyang bahin, si manlalaban Micheal Yu ang kasamtangang IBP Cebu City Chapter President nagkanayon nga ilang gibarugan ang ilang prinsipyo nga ang bag-ong mapili nga presidente sa nasud karong umaabot nga piniliay sa Mayo 10, maoy labing haum nga motudlo sa bag-ong chief justice aron malikayan ang pagduda nga bias si Presidente Arroyo bahin sa bag-ong chief justice. – BANAT NEWS