CEBU, Philippines - Naangol ang usa ka sakop sa kabomberohan nga nakuryentihan samtang nagresponde sa sunog nga mitumaw didto sa barangay Yati lungsod sa Liloan kagahapon sa alas 10:30 sa buntag.
Si FO2 Donato Yongco sa Liloan Fire Station mibutyag dihang nahinabi sa Banat News nga gibanabana nilang moabot lang og P30 mil ang danyos sa naugdaw nga panimalay ni Reynaldo Generalao.
Samtang ang naangol mao si FO1 Eustaquio Jonas human nasagkilan ang live wire sa iyang pagsulod diha sa balay aron mopasirit og tubig.
Matod ni FO2 Yongco tungod sa kakusogsa boltahe natumba gyud si FO1 Jonas hinungdan nga dali nila kining gitabang ug gihatud sa Eversley Hospital sa Jagobiao siyudad sa Mandaue ug luwas na sa peligro ang kahimtang.
Ang kabomberohan padayon pa sa pagtumbok sa hinungdan sa maong sunog.
Samtang siyam ka balay ang naugdaw ug upat ang partially burned sa nahitabong sunog kagahapon sa buntag sa sitio Crasher, barangay Lawaan III, dakbayan sa Talisay nga pulos ginama sa gaay nga material.
Si Talisay City fire marshal Felipe Canillas sa pakighinabi niini sa Banat News miingon nga nakontrolar ang kalayo sulod sa singko minutosug mikabat og P180,000 ang danyos.
Nagsugod kini sa ikaduhang andana sa balay sa magtiayong George ug Amelita Flores ug giingong tungod sa pagkabag-id sa wire sa kuryente ngadto sa atop nga sin sa ilang balay. - Darrel Carumba ug Brenda Batuto (BANAT NEWS)