P300 mil nga corals nasakmit

CEBU, Philippines - Mokabat sa P300 mil nga kantidad sa nasakmit nga sea corals nga buot untang ipalusot sa sitio Kolo sa barangay Punta Engaño dakbayan sa Lapulapu sa milabay’ng hapon.

Ang mga sea corals gipanag-iya ni Inocensio Dehayco Mahusay, 63, residente sa maong dapit.

Matud pa ni Insp. Jacinto Mandal Jr. ang hepe sa operation section sa kapolisan sa dakbayan sa Lapulapu nasayran nga dugay na nilang gipanid-an ang operasyon ni Mahusay sa pagpayuhot sa mga butang nga iya sa kinaiyahan sa kadagatan nga gitawag nga “gasang” nga gidili sa balaod base sa RA 8550 hinungdan nga ila kining gironda.

Lakip sa milangkob sa pagpangronda mao ang mga sakop sa Department of Environment and Natural Resources nga sila ni Rose Saya-ay ug Adelino Padilla Sr.,usa ka NGO.

Atol sa maong operasyon sa kapolisan naabtan sa mga operatiba ang pag-repack ni Mahusay ug sa mga sakop niini sa mokabat 3 mil ka mga gasang nga gisud sa karton ug sako. - Bong Soriano (BANAT NEWS)