CEBU, Philippines - Ang mga manindahay sa karaang merkado publiko sa dakbayan sa Mandaue miawhag sa kagamhanan sa maong dakbayan nga ipaklaro lang kun tinuod bang pabalhinon na sila ngadto sa bag-ong merkado sa sitio Tribunal sa barangay Centro sa maong dakbayan.
Si Terry Calo nga sakop sa board of director sa Mandaue Multi-purpose Cooperative (Mavenco) nga nahinabi sa Banat News miingon nga gikinahanglan nilang masayran ang mga kondisyon sa ilang pagpamalhin ngadto sa bag-ong puwesto. Busa gusto nila nga makigmiting una sila sa mga kadagkuan sa merkado una sila pabalhina aron masayod sila sa gidak-on sa ilang stall ug ang abangan nila matag buwan niini, matud ni Calo. Kini tungod kay nagtuo sila nga apiktado ang ilang pagpaninda kun ibalhin sila ngadto sa bag-ong merkado, dugang pa ni Calo. – BANAT NEWS