CEBU, Philippines - Ang kagamhanan sa dakbayan sa Talisay manawat na usab og mga aplikante sa summer job training sugod sa unang semana sa Abril.
Si Talisay City Administrator Richel Bacaltos nga nahinabi sa Banat News kagahapon mibutyag nga bahinon nila sa tulo ka hut-ong o batch ang mga trabahante kinsa pulos mga estudyante sa maong dakbayan.
Matud pa ni Bacaltos nga sama sa milabay'ng tuig, ang matag batch patrabahuon sulod sa usa ka buwan sa suhol nga tag P250 matag adlaw.
Miingon si Bacaltos nga sa milabay'ng tuig mikabat sa 1,500 ang nangaplay, apan 1,000 ra ang nadawat.
Niining tuiga gilauman nga molapas sa P1,000 ka mga aplikante ang ilang hatagan og trabaho, matud pa ni Bacaltos.
Kasagarang ipatrabaho sa mga kwalipikado mao ang pagpahigayon og survey sa mga barangay aron masuta kun unsay kasagarang suliran nga giatubang sa mga molupyo. – BANAT NEWS