Mga kandidato sa Talisay wala mabalaka ni Joavan

CEBU, Philippines - Ang kampo sa administrasyon sa dakbayan sa Talisay wala mabalaka nga maapektohan ang ilang kandidatura sa isyu bahin sa pagpabadlong sa sinagop ni Mayor Socrates Fernandez nga si Joavan Fernandez.

Si Konsehal Dennis Basillote nga kaalyado ni Fernandez nagkanayon nga misamot hinuon ang suporta sa mga tawo sa ilang grupo kay base sa ilang nadawat nga taho, gusto sa mga Talisaynon nga silang grupoha mao gyud ang mudaog karong Mayo 10 nga piniliay.

Kahinumdoman nga sa gipahigayong private survey ni Ricky Aznar, amahan ni Choy Aznar, kinsa mikandidato karon sa pagka-konsehal sa siyudad, si Basillote ang nag-una sa mga konsehal, samtang 70 porsiyento ang puntos ni Mayor Fernandez itandi sa iyang kaatbang nga si kanhi Bokal Raul Bacaltos kinsa nakakuha lang og 17 porsiyento.

Milusot usab sa maong survey si ex-officio member sa konseho Osmundo Manreal Jr., nga maoy presidente sa Association of Barangay Captain (ABC) sa Talisay, Kapitan Celiapo Cabuenas sa Lagtang, ug ang natagak, mao ang kanhi konsehal sa Barangay Linao nga si Val Yllanan. – BANAT NEWS