Taga Lapulapu gidid-ang manaob

CEBU, Philippines - Higpit nga gipasidan-an sa kabomberohan ang mga molupyo sa dakbayan sa Lapulapu nga maglikay sa pagpanaob karong panahona gumikan sa kapeligro sa sunog bunga sa hilabihang kainit sa panahon.

Matud pa ni Fire Marshall Ricardo Cornelio sa Lapulapu City Fire Department , nga sukad niadtong Marso l, sa paglusad gyud sa usa ka buwang Fire Prevention Month, nakalista na sila og 12 ka mga grass fire o pagkasunog sa kasagbutan.

Miingon si Cornelio nga gumikan sa kauga sa mga sagbot sa palibot, kun madusliban kini og kayo dali ra kaayong mokamang ngadto sa unahan hangtod nga kun makaabot og balay siguradong hastang balay ug mga butang niini maugdaw.

Busa aron kalikayan ang maong katalagman dili angayang manaob og mga sagbot sa palibot sa balay karong panahona. – BANAT NEWS