CEBU, Philippines - Patay nang nahidangat sa tambalanan ang usa ka lalaking giingong misuway og tigbas sa usa ka polis nga mitubag sa alarma sa pagpamusil pasado alas-7 sa miaging gabii sa barangay Pitalo lungsod sa San Fernando.
Ang namatay nailhan nga si Danilo Pardillo, molupyo sa nahisgutang lugar samtang ang nakapusil kaniya mao sila si PO3 Leoncio Salubre Jr. ug PO3 Jesus Bontilao, mga sakop sa San Fernando Police Station.
Sa pakighinabi sa Banat News kang PO3 Salubre, nakadawat sila og tawag gikan sa usa ka tawo kabahin sa insidente sa pagpamusil sa maong dapit.
Dihang gisusi, nasutang gipusil sa namatay ang magsuong sila si Seigfrid ug Seiglenn Laspoña Alfeche sa wala pa matinong hinungdan apan swerteng walay naigo kanila.
Ang mga polis nga miresponde nasugatan ang mga nagdagan-dagang mga barangay tanod ug gisuginlan nga gigukod sila ni Pardillo ug gipamusil, dihang naabtan nila ni Salubre ang suspek ug mipailang sila mga polis kalit sila niining gitigbas ginamit ang pinoteng 22 pulgadas.
Nagpasalamat si Salubre nga nasagang sa iyang gidalang flashlight ang pinote hinungdan nga iyaha kining gibaharan dungan sa pag-atras apan kalit kining midasmag ug miwasiwas sa pinote hinungdan nga gipusil niya kini makausa.
Matud pang Salubre midasmag gihapon si Pardillo maong iyaha kining giusban og pusil apan wala gihapon kini mohunong paggukod sa mga polis hinungdan nga hasta si Bontilao mipusil kaniya sa walang tiil hinungdan sa pagkahagba niini.
Nagtuo si Salubre nga wala gyud niya maigo ang suspek sa pagpusil niya duha ka higayon sanglit diha lang kini nahagba pagkaigo na sa armas ni Bontilao.
Tungod kay samaron ilaha kining gidis-armahan ug gidala sa Carcar City District Hospital apan gideklarar kining dead on arrival, gikatakdang ipa-awtopsiya ang patay'ng lawas niini.
“Self-defense lang to ako gibuhat, tan-aw nako apiki na kaayo mipusil nalang ko kay ako man pod ang madiskuhido,” pasabot pa ni Salubre. – BANAT NEWS