Cebu malinawon atol sa Pacquiao-Clottey fight

CEBU, Philippines - Sama sa mga nangaging away ni Manny “Pacman” Pacquiao mingaw ang kadalanan ug walay dagkong mga krimeng nahitabo sa lalawigan sa Sugbu ug sa dakbayan sa Sugbu sumala pa sa kapolisan.

Sagad sa mga tawo adto tanan mitutok sa sangka ni Pacquiao batok kang Ghanaian welterweight challenger Joshua Clottey kinsa gihimong punching bag kagahapon ni Pacquiao.

Ang mga drayber sa mga pasaheroan mihunong aron pagdalikyat og tan-aw sa maong sangka sa mga mipasalida og pay-per-view nga mga karenderya ug bisan na niadtong late telecast aron lang motan-aw.

Si Sr. Supt. Patrocinio Comendador sa gipadalang text sa Banat News nagkanayon nga ‘negative incidents, so peaceful.’

Ang hepe sa Talisay City Traffic Division nga si SPO4 Henry Obiso nga nahinabi kagahapon sa Banat News nagkanayon nga matag away ni Pacman makapahuway usab sila og pipila ka oras sa pagpamadlong sa mga drayber nga badlungon, mao usab ang nahitabo sa dakbayan sa Sugbu.

Samtang si Sr.Supt. Erson Digal, hepe sa Cebu Provincial Police Office sa pakighinabi niini sa Banat News kagahapon nagkanayon nga sukad sa pagsugod sa duwa ni Pacquiao hangtud nga nahuman wala sila’y nadawat nga mga alarma sa krimen gikan sa mga hepe sa kalungsoran.  – BANAT NEWS