Gibo nagsunod ni Villar

CEBU, Philippines - Nahimo nang ikaduha si kandidato sa Lakas-Kampi-CMD Gilbert “Gibo” Teodoro, Jr. sa listahan sa mga kandidato sa pagka-presidente sa nasud sa umaabot nga piniliay sa Mayo 10 ning tuiga base sa labing awahing survey sa Campaigns and Image Group.

Si Gibo karon ang ikaduha ni Senador Manuel Villar sa Nacionalista Party, ang ikatulo si Senador Benigno “Noynoy” Aquino sa Liberal Party, ika-upat si kanhi Presidente Joseph Estrada, ika-lima si Senador Richard Gordon ug ang ika-unom mao si Brother Eddie Villanueva.

Base sa maong survey niadtong Marso 7, diin may 5,100 ka mga tawong gisukit kinsa ang gusto nilang mahimong presidente sa nasud sa umaabot nga election, si Villar nakakuha og 31 porsiyento,Teodoro 24, Aquino 8, Estrada 6 , Gordon 5, ug 2 porsiyento kang Villanueva.

Gituohan sa taga Campaigns and Image Group nga sa katapusang semana sa Abril hangtod na sa Mayo 10, mag-una na sa tanang kandidato sa pagka-presidente sa nasud ug mangharos na si Teodoro sa adlaw sa piniliay. (Lesley Caminade)    (BANATNEWS)