CEBU, Philippines - Si Catholic Faith Defender Marcelo Bacalso miawhag ngadto sa mga obispo sa kaulohan nga mo-resign na lang sa katungdanan human mopadayag og suporta sa usa ka kandidato sa pagkapresidente.
Matud pa ni Bacalso, ang Canon Law sa Simbahang Katoliko nag-ingon nga ang tanang kaparian ug labaw na ang mga obispo wala tugting makaendorsar ug makapadayag sa ilang suporta sa usa ka kandidato.
Kini bisan pa man ilang klaruhon nga ang ilang pagdayag og suporta ngadto sa mga kandidato personal lamang, matud pa ni Bacalso nga bugtong paagi lamang aron sila dayag nga makasuporta og kandidato sa piniliay mao ang pag-resign sa ilang pagkapari.
Nasayran nga unom ka mga obispo ang mideklarar sa ilang bukas nga pagsuporta ni Ang Kapatiran presidential candidate John Carlos "JC" delos Reyes, nga mao sila si Lipa Archbishop Ramon Arguelles, Bishop Antonio Tobias sa Novaliches, Bishop Joseph Nacua sa Ilagan, Bishop Antonio Palang sa San Jose de Mindoro, Bishop Vicente Navarra sa Bacolod, Bishop Joel Baylon sa Legaspi ug retired Bishop Teodoro Bacani .
Kini tungod kay nakita sa maong mga obispo nga ang plataporma ni delos Reyes nahasubay sa prinsipyo sa simbahan ilabina sa adbokasiya niini batok sa nag-ung-ong nga Reproductive Health bill.
Bisan nahasupak kini sa tradisyon sa simbahan, tak-om pa gihapon ang Catholic Bishop Conference of the Philippines kabahin sa pagsuportar o pag-endorsar og kandidato. Giingon hinuon sa CBCP nga kinahanglang hilom lamang ang usa ka pari sa pagsuporta og usa ka kandidato. (Chester Abadilla) (BANATNEWS)