CEBU, Philippines - Si Konsehal Shirley Belleza sa dakbayan sa Talisay kagahapon gidudahan sa iyang mga kauban nga mibali na ang simpatiya niini ngadto sa oposisyon tungod kay magpunay na kuno kini og kuyog sa grupo sa iyang bana nga si kanhi bise mayor Aberdovey Belleza.
Sila si Konsehal Rodolfo Cabigas, Dennis Basillote ug Alesna maoy mipadayag niining maong katahap sa Banat News gumikan sa matud pa makapaduda kaayong lihok ni Belleza.
Si Cabigas mibutyag sa Banat News nga gidawat sa ilang grupo nga ang kauban nilang konsehala mosuporta sa bana niini kinsa mikandidato karon isip bise mayor sa siyudad ubos sa Liberal Party atbang ni Bise Mayor Alan Bucao sa administrasyon.
Samtang sa laing bahin gipanghimakak sa Konsehala ang bahin usab sa taho nga mipahigayon siya og handshaking uban sa mga oposisyon.
Hinuon agi og pangluod, si Belleza miingon nga wala siya’y mahimo kung ang iyang ka grupo sa administrasyon dili motuo kaniya. – BANAT NEWS