CEBU, Philippines - Gikwestyon sa kahugpungan sa mga urban poor groups sa dakbayan sa Mandaue ang pagpili sa kagamhanan sa siyudad ug mga benepisyaryo sa 9.2 hektaryas nga luna nga gi-award sa korte ngadto sa mga urban poor nga sakop sa Federation of Mandaue Community Urban Poor (FEDMACUPI).
Kini human gihulagway sa bise presidente sa FEDMACUPI nga si Jaime Baga atol sa gipatawag nga press conference nga ang kagamhanan sa siyudad inabagan sa Housing Urban and Development Office (HUDO) maoy nagbuot-buot og pili sa mga benipisyaryo nga walay konsultasyon sa ilang kahugpungan.
Gipasabot niya nga ang ensakto gyud untang proseso mao nga ang Department of Social Welfare and Development (DSWD), barangay, Philippine Commission for the Urban Poor (PCUP), FEDMACUPI ug ang HUDO mao gyud unta ang maghiusa pagpili og mga benipisyaryo.
Duda ang maong grupo nga dunay daghang mga bag-ong urban poor nga dili tinuoray’ng benipisyaryo nga gipasulod niining mga higayuna hinungdan nga mi-apelar sila nga i-plastada ang hustong mga lagda sa proseso pagdawat og mga benipisyaryo.
Nunot niini giawhag sa urban poor groups si Mayor Jonas Cortes pag-turnover ngadto sa FEDMACUPI sa titulo sa 9.2 hektaryas nga luna alang sa dili mominos pito ka mga urban poor groups nga sakop niini ug mao karoy kasamtangang nag-okupar sa maong luna nga nahimutang sa barangay Central, Mantuyong, Guizo, Tipolo ug Subangdaku.
Matud ni Baga duna nay desisyon ang korte nga nagmandong ipa-turnover sa titulo sa maong luna ngadto sa FEDMACUPI subay sa writ of execution nga giluwatan niadtong petsa 14 sa Nobiyembre sa 2007.
Nanganti ang maong grupo sa mga urban poor nga mosang-at og legal nga lakang pinaagi sa ilang abogado nga si Atty. Manuel Monzon kun dili gyud itugyan ngadto nila ang maong titulo nga gihuptan karun ni Cortes. Gisuwayan unta pagkontak ning tigbalita ang mayor kagahapon apan matud sa nakatubag sa buhatan niini nga wala sa iyang opisina ang mayor. - BANAT NEWS