CEBU, Philippines - Nagtingkagol karon sulod sa bilanggoan ang usa ka ginang nga midepensa sa iyang anak nga gikulata sa iyang hubog nga kapuyo nga iyang nadunggaban diha sa sulod sa ilang panimalay sa Perez Compound sa barangay Guizo, dakbayan sa Mandaue alas-4 pasado ang takna sa hapon niadtong miaging adlaw.
Ang namatay pipila ka oras diha sa tambalanan mao si Romeo Delima, 40, gumikan sa usa ka samad dinunggaban gikan sa diyes pulgadas nga kutsilyo dihang gidunggab sa kapuyong si Antonieta Alcala, 33, pulos molupyo sa maong dapit.
Si PO3 Herbert Pelayo sa kapolisan sa Presinto 1 sa Centro Police Station nga nahinabi sa Banat News miingon nga hubog kaayong naabot sa ilang balay ang biktima ug mikasaba ug mikulata sa ilang anak.
Ang ginang daling mipakgang sa suspek hinungdan nga nahitabo ang ilang panaglalis ug nakulatahan ang ginang.
Ang ginang tungod sa pagpangulata wala na makaagwanta sa gihimo sa kapuyo ug kalit nga milanit sa maong kutsilyo ug gidunggab kini ngadto sa likod ni Delima.
Ang mga silingan ug kabanay sa duha mao nay midala sa biktima ngadto sa Mandaue City District Hospital apan human sa pipila ka oras nakabsan kini sa kinabuhi.
Matud pa ni PO3 Pelayo nga malinawon hinuong mitahan ang suspek human sa hitabo ug giandam na ang kasong homicide nga ipasaka batok niini. – BANAT NEWS