Reklamo sa Ombuds gikataw-an ni Koko

CEBU, Philippines - Gibalewala lang ug igo lang gikataw-an si Customs Intelligence and Investigation Services chief Rico Rey "Koko" Holganza ang mga alegasyon sa usa ka reklamante batok kaniya diha sa Ombudsman.

Matud pa ni Holganza daan na siyang nakaangkon og kaharuhay sa kinabuhi gumikan sa iyang mga ginikanan nga prominente usab dinhi sa dakbayan sa Sugbu ug didto sa Bantayan.

Ang propiyedad nga iyang naangkon sa barangay Basak dakbayan sa Sugbu daan nang natukod niadto pang 1998 sa dihang wala pa kini magserbisyo sa buhatan sa Customs ug usa pa siya ka konsehal sa dakbayan sa Sugbu.

Gipasabot ni Holganza nga nasunod lamang niya ang 100 hektaryang yuta sa Bantayan gikan sa iyang mga ginikanan nga ilang gibahin-bahin sa iyang mga igsuon.

Samtang gihimakak niya ang alegasyong nanag-iya siya og usa ka mansyon sa Sto. Niño Village ning dakbayan sa Sugbu.

Nagduda si Holganza nga ang reklamanteng si Hans Ernest Tan Aparice III nga nangangkong usa ka negosyanteng lumad sa Subangdako dakbayan sa Mandaue usa ka “fictitious name” lamang.

Tungod kay nangangkon kining usa siya ka trucker ug importer diha sa iyang reklamo nga dugay nang nakig-transaksyon sa BOC apan dihang gisubay ni Holganza ang ilang rekord sa mga trucking services ug importers diha sa BOC wala kini sa listahan.

Matud pa ni Holganza posibleng adunay tawong maoy nag-mastermind sa pagguba sa iyang reputasyon aron siya wagtangon diha sa CIIS isip hepe. Ang maong reklamante diha sa iyang dokumento pagreklamo unang mihisgot sa pagka-overstaying na ni Holganza sa maong pwesto. – BANAT NEWS