Total motukod og 5 Gasoline Stations

CEBU, Philippines - Usa ka international oil company nga Total (Philippines) Corporation (TPC) ang motukod og dugang lima ka mga service stations nganhi sa dakbayan sa Sugbo human makita ang panginahanglanon niini tungod sa kadaghan sa mogamit na og sakyanan dinhi.

Niadtong tuig 2009 ang Total mitukod sa ilang labing unang gasoline station sa dalan Plaridel, dakbayan sa Mandaue nga gawas sa gasolinahan duna sad kini convenience store ug ATM machine.

Ang mao karon gasoline station adunay gilusad nga promotion sugod niadtong Marso 3, 2010 hangtud sa Abril 4, 2010 alang sa mga motorista nga diin ang matag P500 nga palitong petrolyo adunay madawat nga gift certificate nga mahimong pailisan og usa ka litrong gasoline.

Si Ernst Wanten, President and Managing Director sa TPC sa press conference kagahapon sa buntag diha sa Waterfront Hotel, dakbayan sa Lapulapu mibutyag nga usa sa mga lugar nga ilang napiliang tukoran sa sunod nga gasoline station mao ang Fuente Osmeña.

Ang lima ka gasoline stations mobalor og P120 milyones, ug plano pa usab nila kining dugangan hangtud 20 ka gasoline service stations dinhi lang sa Sugbo.

Si Wanten nagkanayon nga gawas nga maayo ang kalidad sa ilang produkto ug serbisyo nahasubay gyud kini sa patas nga market price.

Ang Total usa ka nag-unang energy company diin gilangkuban kini sa 96,959 ka mga empleyado ug nagpahigayon kini og operasyon sa sobra 130 ka mga nasud.  - Brenda Batuto (BANAT NEWS)