Cardinal Vidal gisaway sa grupo sa abogado

CEBU, Philippines - Gihulagway sa mga opisyales sa National Union of People's Lawyer nga immoral ang pagdawat ni Cebu Archbishop Ricardo Cardinal Vidal sa kwartang gihatag sa mga kandidato sa pagkapresidente.

Kini bisan pa man ang Cardinal miingon nga ang maong kwarta wala niya gamita ug gihatag ngadto sa mga charitable institutions dinhi sa Sugbu.

Matud pa ni NUPL vice president for the Visayas Atty. Poch Cinco nga dili sakto ang pagdawat sa Cardinal sa maong kwarta sanglit maghatag man kini og pagduda nga maempluwensiyahan ang Cardinal sa mga kandidato sa pagpresidente. Sigon pa ni Cinco nga bisan og walay gipangayong bawos ang paghatag sa mga kandidato ngadto sa simbahan dili gihapon kini husto.

“It's not good, it's election time... everybody is trying to win the support of religious leaders. It is really immoral and irregular,” sigon pa ni Cinco sa press conference kagahapong adlawa.

Matud pa niini nga mas maayo untang wala dawata o kaha giuli na lamang sa Cardinal ang maong kwarta aron dili kini dudahan sa mga tawo.

Giawhag hinuon ni NUPL Secretary General Neri Colmenares ang Cardinal nga mopasabot og maayo sa publiko labot sa gihatag nga kwarta.

Nagtuo si Colmenares nga ang maong kwarta gigahin gyud sa mga kandidato alang sa politikanhong katuyuan aron pagsulay og kuha sa suporta sa Cardinal aron usab magamit ang impluwensya niini sa pag-agni sa mga botante pabor sa ilang tagsatagsa ka mga kandidatura.

Tungod niini, si Colmenares mitambag kang Vidal nga dili lamang gyud maghisgot og bisan usa ka kandidato kay mao kini ang maghatag og senyales nga namolitika na ang Cardinal. - Chester Abadilla (BANAT NEWS)