CEBU, Philippines - Arestado ang duha ka mga lalaking giingong sakop sa Roy Quimada robbery group diha sa Talisay atol sa usa ka buybust operation kagahapon sa udto diha sa Ramona Village 2 sa barangay San Isidro dakbayan sa Talisay sa hiniusang operasyon sa Investigation and Detective Management Branch sa Cebu City Police Office ug Talisay City Police Station.
Ang mga nadakpan mao sila si Aljun Sanchez, 22, taga sitio Bulacot sa Sta. Cruz, Tambulig Zamboanga del Sur ug Felixberto Mata, 55, residente sa maong dapit samtang nakaikyas ang anak niining si Filbert “Kokoy” Mata, 34.
Matud pang Supt. Pablo Labra, ang deputy director for operations sa CCPO nga ang mga suspek sakop sa Quimada Robbery Group ug nalambigit na usab karon sa pagpamaligya og shabu.
Ang pagkasikop sa duha natigayon human pag-usab-usab og venue sa transaksyon hangtud nga nasabutan nga diha nalang sa Talisay, gibaligyaan sa grupo ang police decoy og usa ka bultong shabu nga nagkantidad og P40 mil ginamit ang usa ka P1,000 nga marked money ug budol money.
Dihang mideklarar og dakop ang mga polis daling nanagan ang grupo sa balay ni Mata hinungdan nga sila gigukod ug diha masigpati ang tulo ka kahon (300 rounds) nga bala sa kalibre .45 sa compound.
Sa maong pagpangronda na-recover sa mga polis ang usa ka dakung paketeng shabu, duha ka dagkong plastic packs nga may sulod nga kadudahang puti nga pulbos, usa ka 9mm nga pistola, usa ka kalibre .45 nga pistola, usa ka kalibre .38 nga revolver, duha ka buhing bala sa M203, tulo ka box nga bala sa kalibre .45, duha ka magazine sa kalibre .45 ug usa ka XRM nga motorsiklo nga walay plaka nga giingong gipanag-iya ni Mata.
Si Supt. Henry Biñas, hepe sa Talisay police mitug-an sa Banat News nga ang duha positibong gitumbok sa mga testigos sa pagpanulis sa Jevi Money Changer sa barangay Tabunok nga nahitabo niadtong Septiyembre ug gisusi pa usab kun mao ba kini mitulis sa tindahan ni SPO2 Manuel Sarmiento sa Talisay niadtong Oktubre. – BANAT NEWS