Kaso ni Mayor Pua paaksyonan

CEBU, Philippines - Giawhag sa usa ka kanhi kawani sa lungsod ang Ombudsman Visayas nga resolbahon sa labing daling panahon ang kasong gipasaka niini batok ni Mayor Sonia Pua sa lungsod sa Carmen nga na-pending sulod na sa unom ka bulan hangtod karon.

 Si Achilles Hermoso Morales kanhi kawani sa kagamhanan sa Carmen inabagan sa iyang abogado nga si manlalaban John Ismael Borgonia misang-at og kasong paglapas sa Anti Graft and Corrupt Practices Act ingon man malversation of public funds, nepotism, ug falsification of public documents batok kang Mayor Pua.

Sa maong kiha gipasanginlan niini nga maoy pagbuot sa mayor nga ang tanang krudo nga itubil sa tanang sakyanan sa lungsod adto palita sa gas station sa iyang anak nga nahimutang sa barangay Luyang, Carmen. Ang maong mando gipatuman sa mayor sukad kini molingkod isip mayor hulip kang anhing Mayor Antonio Villamor nga namatay diha sa serbisyo.

Gawas niining maong isyu, gireklamo usab ni Morales ang employment status sa anak niini nga si Engr. Victor Pua kansang posisyong pagka-municipal assessor sa Carmen giingong gihimo sa panahon ni kanhi mayor Villamor ,apan nasuta ang matuod nga patay na ang kanhi mayor dihang gitudlo sa maong posisyon si Engr.Pua.

Dugang reklamo batok sa mayor mao ang giingong kapakyas niini pagtunol ngadto sa municipal treasurer’s office sa P400 mil nga ilang ganti sa ilang kadaugan sa Sinulog niadtong 2009. Ang kihante pinaagi ni manlalaban Borgonia misukip sa mga dokumento nga nagpalig-on sa iyang kiha batok sa mayor.

Nunot niini gihagit sa kihante si Ombudsman for the Visayas Pelagio Apostol pagpaubos sa preventive suspension kang Mayor Pua samtang magpadayon ang imbistigasyon kaniya.

Hinuon ang kampo ni Mayor Pua pinaagi sa iyang secretary nga si Dona Buot wala matandog niini ug mihulagway nga usa lang kini ka pamolitika nga may labot niining nagsingabot nga eleksyon.

Nasayran nga ang bise mayor sa lungsod nga si Gerard Villamor maoy moatbang ni Mayor Pua sa eleksyon karong Mayo. – BANAT NEWS