CEBU, Philippines - Kulang og pagtuo si Dangerous Drugs Board (DDB) Undersecretary Paul Clarence Oaminal sa pasangil nga nalambigit ang hepe sa Customs Intelligence and Investigation Service (CIIS-Cebu) nga si Rico Rey Francis “Koko” Holganza sa pagpayuhot sa P3.6 bilyones nga balor sa pseudo ephedrine dinhi sa Sugbo niadtong 2004.
Matud ni Oaminal sa dihang nahinabi sa Banat News daan nang gi-monitor ang maong transaksiyon sa mga ahente sa gobyerno apil na ang Philippine Drugs Enforcement Agency (PDEA) ingon man ang Australian Federal Police gikan pa sa gigikanan sa maong mga kargamento didto sa China hangtod paghiabot sa pantalan dinhi sa Sugbo.
Dugang ni Oaminal nga bisan silang kanhi Bise Gobernador John Gregory “John-John” Osmeña ug mga foreign contacts nga sila si Mike Cummings ug Dirk Hultz apil sa gi-monitor sa mga ahente sa PDEA-7.
Sumala pa ni Oaminal nga wala gyud ma-establisar sa imbestigasyon ang kalambigitan ni Holganza sa maong nabulilyaso nga transaksiyon ug gani matud ni Oaminal nga ang Bureau of Customs pa ang miabag sa PDEA ug Australian Police sa dihang gisakmit ang maong mga kargamento nga sagol paghimo og shabu diha sa Cebu International Port (CIP).
Apan alang kang Oaminal dili siya pabor nga banhawon og balik ang imbestigasyon sa maong kaso tungod kay kun siya ang pabut-on angay i-refile ang kaso batok ni Osmeña human kini gibasura sa korte.
Si Holganza gireklamo sa Ombudsman-Visayas tungod sa mga giingong ill-gotten wealth niini sama sa pagbaton og mansion ug tulo ka andana nga building ug mga sakyanan ug kayutaan bisan og nagdawatan lang kini og P14 mil nga suholan matag bulan ug gipasanginlan kini nga nalambigit sa pagpalusot sa pseudoephedrine niadtong Marso sa 2004.
Giawhag ang Ombudsman-Visayas sa pagpakigkooperar sa PDEA ug Department of Justice aron sutaon ang kalambigitan ni Holganza sa pagpalusot sa pseudo ephedrine sa maong tuig. Si Holganza mihimakak sa taho nga iya ang maong mansion. Gihimakak usab niya ang kalambigitan sa importasyon sa maong kemikal. – BANAT NEWS