CEBU, Philippines - Nangapod -apod og mga hinabang nga notebook, papel, lapis ug ballpen ang grupo sa mga langyaw nga naminyo og mga Pinay sa mga kabus nga tinun-an sa elementarya sa bukirang bahin sa barangay Basak, lungsod sa Compostela sa milabay’ng adlaw.
Dili muminos 196 ka mga tinun-an gikan sa Grade one hangtud sa Grade-6 sa maong tunghaan maoy nakadawat sa maong mga hinabang busa nalipay kaayo sila lakip na ang ilang mga ginikanan.
Ang maong hinabang hinatag sa mga Hapon nga nabana sa mga Filipina nga taga Consolacion kansang kasingkasing mibati og kaluoy sa mga kabus nga mga estudyante sa maong lungsod.
Si Vice Mayor Joel Quinio sa Compostela kinsa lumad usab nga molupyo sa Basak maoy nag-asikaso aron makadawat og mga libreng notebook , papel ug lapis ang maong mga tinun-an.
Gibutyag ni Quinio nga siya maoy naningkamot pinaagi sa pagkombinser sa mga magtiayon kansang mga bana mga Hapon aron makatabang sila sa mga tinun-an sa maong lugar. Alang kang Quinio dili lang kay ang mga tinun-an sa bukirang barangay sa Basak, kundili tinguhaon niya nga ang tanang nanagtungha sa elementarya sa tibuok lungsod makadawat usab og susamang hinabang nga gikan sa nagkalainlaing tinubdan.
Kini samtang napanglantawan ni Quinio ang kapiit unya sa mga ginikanan sa mga galastuhon sa pagtungha sa ilang mga anak sa umaabot nga pagbukas sa klase karong Hunyo.
Ang barangay Basak may gilay-ong 7 kilometros gikan sa Poblacion , sa Compostela nga maoy lugar nga natawhan sa bise mayor. - Darrel A. Carumba (BANAT NEWS)