Curfew ipatumang hingpit

CEBU, Philippines - Ang hugot nga pagpatuman sa curfew alang sa mga menor de edad maoy usa sa nakitang solusyon sa nagkagrabe nga krimen nga gimugna sa mga gang sa mga batan-on karong panahuna.

Mao kini panglantaw ni SPO1 Jay Yballe, imbestigador sa Homicide Section sa Cebu City Police Office (CCPO) kinsa mibati og kapikal niining pagsulbong karong krimen nga naglakip na sa pagpatay sa mga kabataan sa kadalanan.

Gawas sa curfew, ang laing maayong lakang nga angayang sagupon sa mga otoridad mao ang pagpakigsabot-sabot sa mga ginikanan ug sa mga kapolisan aron kaiban-ibanan   ang kagubot nga adunay kalambigitan sa batan-on.

Samtang nakita usab ni Yballe nga ang pagdani sa mga batan-on aron mawili sila sa mga duwa ug paugnat sa kusog kon sports, usa usab sa mga maayong lakang aron nga dili na sila makahuna-huna sa pagbuhat og binuang.

Midugang siya nga karong taliabot na ang summer, kasagaran sa mga batan-on walay lingaw busa aron nga dili sila matintal sa pagkuyog sa mga barkadang kriminal, mas maayong danihon sila sa mga ginikanan nga mosalmot sa mga paugnat sa kusog sa ilang barangay ug uban pang gimbuhaton nga mapuslanon.

Sa bahin sa kapolisan, si Yballe miingon nga ilang panghingusgan ang pag-roving sa matag suok ug lugar ning dakbayan ilabi na sa mga dapit nga popular na kaayong mahitaboan sa pinusilay ug dinunggabay.

Kahinumdoman nga duha na ka insidenti sa pagpamusil kansang mga suspetsado pulos mga menor de edad nga miyembro sa gang ug ang ilang mga biktima mga inosente usab nga mga batan-on ning dakbayan. - Lesley Caminade (BANAT NEWS)