Duha ka mangingilad nadakpan

CEBU, Philippines - Duha ka tawo kinsa nasakpang nangilad sa taga sitio San Antonio, barangay Linao, dakbayan sa Talisay nasikop ug nagkagulkol na karon sa prisohan.

Ang misikop sa mga suspetsado pinaagi sa citizen’s arrest mao sila si Joel Canete, 40, site engineer sa Department of Public Works and Highways (DPWH) ,sa 2nd Engineering District ug Bobet Cedentario, 28, pulos taga Linao.

Ang nagpahayahay na karon sa bilanggoan mao sila si Cris Mangcao Colegado, 26, taga Fairview, Riverside, dakbayan sa Talisay ug John Paul Celis, 20, taga barangay Inayawan, dakbayan sa Sugbo.

Ang mga biktima mao sila si Jerry Restauro, 53, ug Radney Nobra, 41, nga pulos taga Linao.

Si Canete nga nahinabi sa Banat News kagahapon mibutyag nga natahap sila sa mga lihok nila ni Colegado ug Celis tungod kay ang mga dunggan niini puwerting dagkuag buslot sa ariyos ug napuno sa patik ang mga lawas.

Ang duha mitunol og solicitation letter ngadto sa ilang biktimahunon nga nangayo og kuwarta kay para kuno sa liga sa basketball karong summer.

Si Canete nga nagduda pag-ayo sa hitsura sa mga suspek misamot og katahap dihang siyam ka mga lugar ang gipanghinganlan nga ilang pinuy-anan nga naglakip sa barangay Maghaway, Talisay.

Dihang gisukit ni Canete ug Cedentario ang maong mga suspek bahin sa mga tawong namirma sa solicitation letter nga walay letter head mitug-an ang duha nga wala sila makaila sa maong mga signatories.

Gumikan niini mitawag dayon si Canete ug Cedentario sa mga polis sa dakbayan ug dihang giimbistigar kini, ilang giangkon nga pinunitan lang nila sa dalan ang maong solicitation letter ug ila kining gipangilad aron makakuwarta.

Ang maong solicitation letter nga gitugyan ngadto sa mga polis may tulo na ka pirma sa mga nakahatag og kuwarta nga mao sila si Mr. & Mrs. Francis Antipoda nga mihatag og P210.00, Gia Sapio, P300 ug Marissa Villamarzo, P100.

Kagahapon sa buntag si Canete ug Cedentario mibalik sa Talisay City Police Station sa pagsang-at og tukmang kaso batok sa mga suspetsado. – BANAT NEWS