Tulisan milangoy nadakpan

CEBU, Philippines - Lima ka mga suspetsado sa pagpanulis sa manag-uyab diha Mulle Osmeña sa barangay Poblacion, dakbayan sa Lapulapu nadakpan sa kapolisan.

Ang gipasakaan og kasong robbery with attempted homicide mao sila si Rexan Cadavero alyas Dawning, 21, taga Looc sa maong dakbayan, Ruzel Deota Flores, alyas Osing, 23 nga taga sitio Langob sa barangay Poblacion, Francis Baba Clavio, 19 nga taga Basak, Roly Reyes Lopango, Zamora, 21, ug usa ka minor de edad nga lalaki.

Ang lima maoy gitumbok sa manag-uyab nga sila si Ma. Lezzel Tampus, 20, ug Franklin de Vera Reyes, 25, nga maoy mitulis kanila samtang sila naglakaw diha sa nahisgutang dapit niadtong milabay'ng gabii aron managkot sa simbahan sa Birhen sa Regla.

Si PO3 Elmer Canillo sa Theft and Robbery Section sa kapolisan sa maong dakbayan nga nahinabi sa Banat News miingon nga duha sa mga tulisan ang milipot sa manag-uyab ug gipangtionan og kutsilyo ug dayon mideklarar og tulis.

Ang mga tulisan mikuha sa cellphone ni Tampus hinungdan nga mipalag si Reyes apan gidunggab kini hinungdan nga nanagan nalang silang duha padulong sa dagat ug nangambak.

Apan ang tulisang si Cadavero wala gihapon matagbaw milayat usab sa dagat ug gigukod ang mga biktima, ang mga tawo nga nakadungog sa siyagit sa duha daling mitabang pagsikop kang Cadavero.

Si Cadavero mitug-an sa kapolisan si kinsa ang iyang mga kaubanan hinungdan sa pagkasikop nilang tanan diha sa ilang mga panimalay, nakuha diha sa panimalay sa mga suspek ang pipila ka mga cellphone nga gituuhang tinulis sa grupo. – BANAT NEWS