CEBU, Philippines - Giaprubahan na ni Assistant Ombudsman Virginia Palanca Santiago ang pagpahigayon og fact finding investigation kabahin sa mga report sa mga pamantalaan nga paggamit sa kontrobersyal nga anak sa mayor sa Talisay nga si Joavan Fernandez sa sakyanan sa amahan sa paglulinghayaw niini.
Sumala pang Santiago, nagsugod na ang ilang mga imbestigador sa pagsusi sa maong mga report batok sa anak ni Mayor Socrates Fernandez nga si Joavan.
Iyang gitataw nga ang ilang pasiunang pakisusi gibase lamang sa newspaper clippings diin gikataho nga ang sakyanan sa buhatan ni Talisay City Mayor Socrates Fernandez gigamit ni Joavan sa pag-adto sa balay kahilayan. Gipahibawo usab ni Santiago nga ila nang gipangayoan si mayor Fernandez sa pagduso og dokumento sa sakyanan nga gigamit sa iyang anak bisan dili kini usa ka opisyal o kawani sa Talisay City government.
Ang kaatbang sa mayor nga si kanhi Bokal Raul Bacaltos mihulagway nga pagpangabuso ang gihimong paggamit sa sakyanan sa gobiyerno sa sinagop sa mayor.
Matud pa niini ang gibuhat karon ni Joavan dili na alang sa “for official use only” ang sakyanan sa gobiyerno sa Talisay kondili “for abuse only” na kini. Gihulagway usab ni Bacaltos nga dili na angayang ikahibulong ang pagpangabuso ni Joavan tungod kay kaniadto pa nakadawat na siya og mga report nga gihimong ‘service’ sa anak sa mayor ang ambulansiya sa siyudad, ang pumpboat gamiton sa Bantay Dagat gigamit niini kaniadto sa pagsuroy-suroy diha sa kadagatan uban sa iyang mga higala. Ang regional director sa Department of Interior and Local Government (DILG) nga si Pedro Noval dihang gitawagan sa Banat News nagkanayon nga ubos sa Commission on Audit (COA) Rules ang pag-abuso paggamit sa sakyanan sa gobiyerno.
Ang COA dunay gitukod nga taskforce nga gilangkuban sa buhatan sa Ombudsman ug Land Transportation Office (LTO) nga maoy mga manakop sa mga red plates o mga sakyanan sa gobiyernong gigamit sa dili official business.
Bisan pa sa pagpabadlong sa sinagop sa mayor sa Talisay, nag-una gihapon si Fernandez sa survey nga gipahigayon ni Ricky Aznar, amahan ni Choy Aznar kinsa midagan isip konsehal sa siyudad.
Apan si Bacaltos mihulagway nga misleading ang gihimo sa grupo sa mayor sanglit ang ipahibawo nila sa mga bisitahong barangay walay kaatbang ang mayor karong umaabot nga piniliay. – BANAT NEWS