Gang War 2 gipatay

CEBU, Philippines - Duha ka batan-on ang nakalas sa lain na usab krimeng may kalambigitan ang panagribal sa Bloods Gang ug Crips Gang pasado alas-3 sa kaadlawon kagahapon diha sa sitio Sampaguita barangay Tejero.

Ang namatay nailhan nga sila Kenneth Veloso,18, sakop sa Bloods Gang, ug Ana Mary Bukiron, 14, nga iyang silingan ug pulos molupyo sa nahisgutang lugar samtang naangol ang laing kauban nilang si Jeffrey Villomo, 18.

Ang suspetsado mao ang usa ka Jordan Alueta, 18, mulupyo sa sudlonong bahin sa sitio Ponce 2 sa barangay Carreta nga sakop sa karibal nga gang sa mga biktima ug giingong kanhi uyab sa uyab ni Veloso nga usa karon sa mga testigos sa hitabo.

Sa imbestigasyon sa Homicide Section pinangulohan ni SPO4 Alex Dacua sa pakighinabi sa Banat News nga nag-estambay sa mga miyembro sa grupo ang mga biktima daplin sa dalan niadtong tungura dihang kalit miabot ang suspek dayon namusil kanila.

Ang mga kahigalaan sa duha nagkatibulaag og panagan ug nabiyaan ang mga biktima nga dunay mga samad pinusilan sa nagkadaiyang parte sa kalawasan, si Veloso naigo sa tuong bahin sa ulo, likod, walang abaga, tuong bukton ug walang bahin sa iyang bitiis.

Samtang si Bukiron nakaangkon og samad pinusilan sa tuong bahin sa likod, tuong tuhod, tuong bukton. Si Villomo nakaangkon usab og samad pinusilan sa iyang tuong bukton.

Ang tulo daling gidala sa Cebu City Medical Center apan si Veloso gideklarar nga dead on arrival, pipila ka oras ang milabay namatay si Bukiron.

Nakuha sa crime scene ang siyam ka kabhang sa kalibre .9mm pistol nga maoy gikatahong gigamit sa pagpamusil.

Sa pakighinabi sa Banat News ni SPO1 Jay Yballe, imbestigador sa Homicide Section posibleng selos ang motibo sa pagpamusil tungod kay base sa nakuha nilang impormasyon kanhi uyab sa 16-anyos nga testigo ang suspek ug posibleng nagselos kini, ug napagan lang si Bukiron.

Ang Bloods ug Crips gangs dugay nang managkaribal nga miresulta sa mga kagubot. Ang mga sakop niini kasagaran mga menor-de edad nalambigit na sa mga krimen dinhi sa dakbayan.

Samtang si Cebu City Mayor Toms Osmeña sa iyang bahin mibutyag nga mopagawas siya og P50mil isip pahalipay sa tawo nga makasikop sa maong mamumuno. – BANAT NEWS