CEBU, Philippines - Nabulit og samad dinunggaban ang kalawasan sa usa ka habal habal drayber human kini gipatay sa lalaki nga nasukong iyang gipaninglan sa utang nga napildi sa tari sa barangay Tugbungan lungsod sa Consolacion niadtong Lunes sa alas 7:20 sa gabii.
Ang biktima nga dead on arrival sa tambalanan mao si Sunday Isoto, 33, molupyo sa maong lugar samtang ang gitumbok nga suspek mao si Ariel Puso, 31, lumad nga taga Palompon Leyte apan kasamtangang nagpuyo sa maong lugar.
Matud ni SPO2 Arnold Omania sa Consolacion Police dihang nahinabi sa Banat News giapas sa biktima ang suspek gitrabahoan sa kapuyo sa suspek sa aron kini paninglon sa kwartang gihuwaman niini nga napildi sa tari.
Apan nagkalalis ang biktima ug suspek dihang gipamugos sa biktima ang pagsingil sa P2,000 hinungdan nga nasuko ang suspek ug mikuha og kutsilyo dayong dunggab sa biktima makadaghang higayon. Dili muminos walo ka samad dinunggaban ang naangkon sa biktima duha sa dughan, ingon man sa ubos nga bahin sa tiyan, kilid ug mga kamot ug sa batiis.
Ang biktima gisuwayan pa unta og hatud sa Eversely Hospital sa Jagobiao Mandaue apan gideklarar nga dead on arrival. - Darrel Carumba ug Romeo Limpangog (BANAT NEWS)