CEBU, Philippines - Nadakpan na sa kapolisan ang tulo ka tulisang mipatay sa 14-anyos nga sakristan human sa gipahigayong hot pursuit operation sa kapolisan sa Guadalupe, Theft and Robbery Section ug Investigative and Detective Management Branch (IDMB) pinanguluhan ni Chief Inspector George Ylanan.
Ang nasikop mao sila si Marvin “Mabs”, “Otot” Sanchez, 25, maoy gitumbok nga leader sa ilang grupo, Joypher Tatoy, 22, nga gitumbok nga maoy gunman pulos taga sitio Gun Club-Banawa barangay Guadalupe ug pulos miyembro sa Bloods Gang ug ang drayber nga 16-anyos.
Samtang atol sa pagkasikop sa tulo, naapil usab ang laing suspek sa laing insidente sa pagpanunggab sa Guadalupe nga binuhatan gihapon sa maong gang nga si Jason “Topak” Capacite Villarma,18, nga nahitabo niadtong Marso 6 sa gabii.
Sila si Sanchez, Tatoy ug ang 16-anyos positibong gitumbok sa mga testigos usa na niini ang 13-anyos nga nakakita pagtulis ug pagpusil patay sa sakristan nga si Carlo Mangitngit.
Tungod kay parehong mga gidudahang sakop sa maong gang ug sakop sa Guadalupe ang dapit nga gihitaboan, nag-usa kini sa IDMB pagpahigayon og hot pursuit operation sa miaging gabii diha sa sitio Gun Club sa Banawa.
Ang testigo mihatag og ideya sa kapolisan sa tupi sa buhok sa usa sa mga tulisan hinungdan nga dihang ilang nasigpatan si Sanchez kauban si Villarma sa sitio Gun Club ilaha kining gisikop, si Villarma daan nang maoy gitumbok nga maoy midunggab kang Fortunato “Dondon” Ibon.
Si Sanchez dihang giatubang sa 13-anyos nga saksi positibong miila kaniya, si Sanchez mao usab ang mitug-an sa kapolisan sa gikahimutangan sa mga kauban nga sila Tatoy ug sa menor de edad.
Dihang gisusi ang balay sa 16-anyos nga drayber wala kini didto apan nakuha sa mga polis ang gigamit nga motorsiklong gipanag-iya sa amahan niini nga may plakang YL-4926.
Kagahapon sa buntag ang menor de edad kauban ang ginikanan boluntaryong mitahan sa iyang kaugalingon ngadto sa opisina sa IDMB.
Si Cebu City Police director Patrocinio Comendador mikonsiderar nang sulbad ang maong kaso ug lig-on ang mga ebidensyang ilang nakuha.
Samtang si Senior Inspector Mario Monilar, hepe sa Guadalupe Police Station nagkanayon nga ilang nakuha ang kalibre .38 nga adunay pito ka buhing bala sa usa ka lugar nga maoy gibinlan ni Tatoy sa armas samtang ang slug giturn-over usab niini.
Nabawi usab sa kapolisan ang cellphone ni Mangitngit nga giprenda ni Sanchez ngadto sa iyang uyoan og P200.
Matud pang Ylanan base sa ilang pagsukit-sukit nagbuntag sila og inom gikan niadtong Marso 6 sa gabii hangtud Marso 7, dihang nahutdan og kwarta nanakay sila og motor ug naagian ang biktima nga nag-text sa dalan.
Diha-diha ilaha kining gihunongan ug gitulis apan misangpot sa pagkapatay hinuon sa biktima, apan bisan paman niini, ang nakuha nilang cellphone ilang giprenda sa uyoan ni Sanchez ug gipalit og ilimnon ug nagtiwas og inom nga daw sa wala ra silay napatay nga tawo.
Sa pakighinabi sa Banat News kang Tatoy, mipadayag kini sa pagmahay tungod kay wala gyud niya tuyoang pusilon ang biktima apan nahitabo gyud.
Nasuta gikan kang SPO1 Ceilo Bonite sa Guadalupe Police Station nga bag-uhay palang nakagawas sa Cebu City Jail si Sanchez, samtang ang 16-anyos nga suspek nangangkong wala gyud siya masayod nga mao kadto ang buhaton sa mga kauban, nasayran nga kanhi sacristan usab kini kaniadto apan mihunong tungod kay mitrabaho sa usa ka bus company. – BANAT NEWS